 |
| CEO ថ្មី Tim Cook និងលោក Steve Jobs |
កាលពីម្សិលម៉ិញ ប្រិយមិត្តបានដឹងហើយថា Samsung បានក្លាយជាក្រុមហ៊ុនដែលផលិតទូរសព្ទធំជាងគេលើលោក ដោយលក់ទូរសព្ទបានជាង ៩០លានគ្រឿង ដែលមានន័យថា ទូរសព្ទ១ក្នុងចំណោម៤ ដែលលក់ គឺជារបស់ Samsung។ ចំនួនដ៏ច្រើននេះ បានធ្វើឲ្យ Samsung អាចទម្លាក់ដំណែងដ៏យូររបស់ Nokia បានផងដែរ។
មិនត្រឹមតែប៉ុណ្ណោះទេ បើនិយាយពី Smartphone តែមួយមុខ ក៏ក្រុមហ៊ុននេះ អាចយកឈ្នះ Apple បាននោះដែរ ដោយសារតែក្រុមហ៊ុនរបស់កូរ៉េខាងត្បូងមួយនេះ អាចលក់ smartphone បាន ៤៤,៥លានគ្រឿង ស្មើនឹង ៣០,៦ភាគរយ ខណៈដែល Apple លក់បានតែ ៣៥,១លានគ្រឿង ស្មើនឹង ២៤,១ភាគរយក្នុងចំណែកទីផ្សារ។
ប្រិយមិត្តប្រហែលជាពិបាកនឹងជឿ ប៉ុន្ដែធាតុពិតគឺ Samsung បានលក់ ទូរសព្ទត្រកូល Galaxy បាន ២ម៉ឺនគ្រឿងក្នុងមួយម៉ោង ក្នុងរយៈពេលបីខែដើមឆ្នាំ២០១២ ដែលជាចំនួនមួយដ៏ច្រើនស្ទើមិនគួរឲ្យជឿ។
ការចាញ់ Samsung នាពេលនេះ បានធ្វើឲ្យគេនឹកឃើញដល់ការទស្សន៍ទាយរបស់អ្នកវិភាគមក ពីក្រុមហ៊ុនស្រាវជ្រាវ Forrester ដែលព្រមានពីការធ្លាក់ចុះនៃ Apple ក្រោយពីគ្មានការដឹកនាំពីលោក Steve Jobs។
លោក George Colony ដែលជា CEO របស់ Forrester ធ្លាប់បាននិយាយថា នៅពេលដែល Steve Jobs ស្លាប់ទៅ គាត់បានយកវត្ថុបីទៅជាមួយនឹងគាត់ ដែលក្នុងនោះ មាន ភាពជាអ្នកដឹកនាំ សមត្ថភាពក្នុងការប្រឈមមុខនឹងហានីភ័យធំៗ និងសមត្ថភាពក្នុងការឆ្លៃផលិតផលថ្មី។
ចង់ដឹងថា Apple ពិតជាថយចុះមែននោះ ត្រូវរង់ចាំមើលលទ្ធផលនៃត្រីមាសទីពីរនេះបន្តទៀត ប៉ុន្ដែទំនងជាមិនអាចកែប្រែស្ថានការណ៍នោះទេ ប្រសិនបើគ្មានផលិតផលថ្មីទេនោះ។
ដោយ៖ ដានី
0 comments:
Post a Comment