យោងតាម Wall Street Journal បានឲ្យដឹងថា ប្រាក់ចំណូលក្នុងបីខែដំបូងនៃឆ្នាំ២០១២នេះ បានកើនឡើងដល់ទៅ ៤៥ភាគរយ ស្មើនឹង ១,០៦ពាន់លានដុល្លារក្នុងមួយត្រីមាស បើធៀបនឹងរយៈពេលដូចគ្នាកាលពីឆ្នាំ២០១១។
ប្រាក់ចំណូលដែលបានមកពីការផ្សាយពាណិជ្ជកម្ម បានកើនឡើង ៣៧ភាគរយ ខណៈប្រាក់ចំណូលពីប្រភពផ្សេងៗទៀត បានកើនឡើង ៩៨ភាគរយ។ ខណៈដែលប្រាក់ចំណូលកើនឡើង អ្នកប្រើប្រាស់សកម្មប្រចាំខែរបស់បណ្ដាញសង្គមមួយនេះក៏បានកើនឡើង ផងដែរ ពោលគឺកើន ៣៣ភាគរយ និងអ្នកប្រើប្រាស់សកម្មប្រចាំថ្ងៃ កើនឡើង៤១ភាគរយ ស្មើនឹង ៥២៦លាននាក់។
សរុបទៅ អ្នកប្រើប្រាស់សកម្មប្រចាំខែរបស់ Facebook បានកើនឡើងដល់ ៩០១លាននាក់ហើយ។
ប្រាក់ចំណូលច្រើនមិនប្រាកដថាចំណេញ ជាក់ស្ដែង Facebook បានជួបប្រទះហើយនាពេលនេះ ដោយបានថយចុះប្រាក់ចំណេញ ១២ភាគរយ ពោលគឺធ្លាក់ចុះពី ២៣៣លានដុល្លារ មកត្រឹម ២០៥លានដុល្លារ បើធៀបនឹងរយៈពេលដូចគ្នាកាលពីឆ្នាំមុន។
ប្រិយមិត្តប្រាកដជាដឹងហើយថាហេតុអ្វីបានជាប្រាក់ចំណេញបែរជា ថយចុះទៅវិញ ស្របពេលដែលប្រាក់ចំណូលបានកើនឡើងយ៉ាងច្រើននោះ? ចម្លើយគឺការចំណាយរបស់ក្រុមហ៊ុននេះ ក៏ច្រើននោះដែរក្នុងរយៈពេលនេះ គឺកើនឡើងចំណាយលើផ្នែកទីផ្សារ ព្រមទាំងការកើនឡើងចំណាយយ៉ាងខ្ពស់លើផ្នែក ស្រាវជ្រាវ និងអភិវឌ្ឍរបស់ក្រុមហ៊ុន។ ការជួលទីតាំងសម្រាប់មជ្ឈមណ្ឌលទិន្នន័យ ក៏ជាផ្នែកមួយនៃចំណាយដ៏ច្រើននោះដែរ។
ដោយ៖ ដានី
0 comments:
Post a Comment