Thursday, April 5, 2012
0 Google ទទួលបណ្ដឹងរឿង YouTube សារជាថ្មី!
Google បានទទួលបណ្ដឹងទៀតហើយនាពេលនេះ គឺជាបណ្ដឹងដែលទាក់ទងនឹង YouTube ដែលជាវែបសាយវីដេអូរបស់ Google។ ទោះបីជាយ៉ាងណាក្ដី នេះមិនមែនជាបណ្ដឹងថ្មីនោះទេ ពោលគឺបណ្ដឹងដែល Google ធ្លាប់ ឈ្នះនៅសាលាដំបូង (តុលាការតាមតំបន់) របស់អាមេរិក ប៉ុន្ដែត្រូវបានសាលាឧទ្ទរណ៍ (តុលាការកម្រិតទី២) នៃប្រទេសនេះ លើកយកមកសារជាថ្មី។ ដើមបណ្ដឹងគឺក្រុមហ៊ុន Viacom Inc របស់អង់គ្លេស ដោយចោទ Google ថាបានបំពានលើច្បាប់កម្មសិទ្ធិបញ្ញានៃវីដេអូរបស់ខ្លួន ដោយសារតែ Google បានយកវីដេអូទាំងនោះដាក់ក្នុង YouTube ដោយគ្មានការអនុញ្ញាតិ។
តុលាការកម្រិតទីពីរនេះ បានថ្លែងកាលពីថ្ងៃព្រហស្បតិ៍ម្សិលម៉ិញនេះថា បណ្ដឹងនោះគឺសមហេតុសមផល ដូច្នេះការកាត់សេចក្ដីរបស់ សាលាដំបូង គឺពិតជាមិនត្រឹមត្រូវ។
ជុំវិញការគាស់កកាយរឿងចាស់នេះ ទាំង Google និង Viacom មិនទាន់បញ្ចេញប្រតិកម្មយ៉ាងណានោះទេ ហើយក៏មិនបានឆ្លើយតបចំពោះសារព័ត៌មាននោះដែរ។
គួររំលឹកផងដែរថា បណ្ដឹងដំបូងដែល Viacom ប្ដឹង Google នោះ គឺតាំងតែពីឆ្នាំ ២០០៧ មកម្លេះ ដោយក្រុមហ៊ុនមួយនេះទាមទារប្រាក់ ១ពាន់លានដុល្លារពី Google។
នៅក្នុងពាក្យបណ្ដឹងនោះ ដើមបណ្ដឹងបានចោទប្រកាន់ថា YouTube បានដាក់វីដេអូចំនួន ៧៩០០០វីដេអូ ដែលបំពានលើកម្មសិទ្ធិបញ្ញា ចន្លោះពីឆ្នាំ ២០០៥ ដល់ ២០០៨។
យ៉ាងណាមិញ លទ្ធផលយ៉ាងណានៃបណ្ដឹងថ្មី លើរឿងក្ដីចាស់នេះ នៅមិនទាន់ដឹងនោះទេ។ កុំភ្លេចតាមដានជាមួយ You See You Do! ដើម្បីបានទទួលនូវព័ត៌មានបច្ចេកវិទ្យាថ្មីៗ!
Labels:
ព័ត៏មានបច្ចេកវិទ្យា
Subscribe to:
Post Comments (Atom)
0 comments:
Post a Comment